匯豐HSBC PRA 優先股贖回一事，之前自己寫左一半，不過懶懶地冇寫落去。好彩應承左風兄要寫，所以先有動力記錄清楚心得。
Above par 已過call day 或者接近call/mature day嘅債/ETD，其實買之前應該要計岩數。事源在下上個月嘅目標係初步完成我嘅第一個IB倉組合，為咗鍛鍊自己嘅決斷力，急於求成下買入左HSBC PRA 優先股作為組合其中一員。而最近風兄同Kano都有寫到因為美國長期低息政策，公司未必會選擇provide咁大息差，而會收回高息債，出新嘅低息債。
今日（上星期）收到消息，HSBC PRA即將贖回。喺above par價位下買入嘅我，都唔知自己收過一次息未。其實係無論債券或優先股，即使係above par ，都可以計算，喺call day前總共會收到幾多息。如果中間差價係可以補回，咁喺call day之後收回都可以break even嘅。但我買入前偏偏冇咁做。
其實風兄著作當年已經有提過Above par贖回一事，剛好又是匯豐，所以其實又未算話真係十分意外。分配資金時除左考慮會唔會執笠之外，仲會睇下價錢。當時已經幾抗拒above par，相對會放細份啲。
中學時神父有教過：孝有三，大孝尊親，其次不辱，其下能養。其實呢個Hierachy都可以用到喺學習投資上，最好係做到，了解公司基本面（要時間、知識、經驗），做唔到嘅，其次要計岩數（內含價值、溢價、安全邊際）(which is 今次其實我係有能力做到，但我都冇做，所以係抵死嘅），再做唔到，其下：資產分配，分散風險。而我今次做得岩嘅地方，就係分散風險。今次嘅經驗亦都正好係一個例子，喺知識同經驗不足嘅情況下，的確係可以分散風險嘅。
蒙格佢係完全唔同意應該分散風險嘅，佢覺得只要你知自己買實岩嘅野，點解唔買多啲。老實講，我真係唔敢講話知道自己買緊乜野。非全職投資者，分散投資，降低風險，好重要。
講翻我呢筆。如果比我再喺嗰個時間再做多次決定，會唔會買HSBC PRA，答案係好可能都會。因為目前一個大家都面對緊嘅困難係：好似揾唔到明顯比較優秀嘅alternative。好似我今次咁，其實買得唔多，我投入喺HSBC PRA嘅資金只係我成個倉總成本嘅約2%，而我今次嘅損失亦只係幾百蚊港紙，所以呢個教訓係值得俾嘅。但一樣還一樣，冇計足數，計岩數，呢個係我自己嘅不足。有能力可以做好嘅野又唔去做，無形中增加左自己嘅風險，呢一點要好好檢討。
Kano提起，有別於以前低息口低通脹，或者高息口高通脹，而家係玩低息口高通脹（原理我知知地但都未解到，可以揾日再温多次書），starman當年嗰套債reits配槓杆，遇上低息時代重臨，都未必可以照單全抄。以我功力，又未自創到適合呢個時代嘅策略，但我信in the long run經濟係會向上的，所以繼續儲資產，只係會唔會加大風險來加大回報，以捉緊可能的經濟復甦（又或者遇上黑天鵝，畢竟呢一年嘅股災反彈得太快，夠竟算唔算一個週期嘅recession?），就係下一樣我要好好考慮嘅問題了⋯⋯⋯⋯⋯⋯
(p.s.又係一落筆就停唔到手)
