標籤

2020年5月30日 星期六

價值投資者的孤獨(一)


這不是一篇實用文章,只是一名青年的無病呻吟,請勿見怪。

以前一直不敢自稱為一個價值投資者,一來投資經驗淺薄,二來對價值投資或者投資的概念還是很模糊,如果一個新手以此自居,恐怕貽笑大方。

但最近心態有點改變,雖說接觸價投還不到三數年,但漸漸的,無意中發覺到自己對股市、經濟、金融的看法有點不一樣,又或者說,更加實在、清晰。

最主要的轉變,就是fact check的精神,以及打爛沙盤問到篤,在理解投資背後運作之前,不(敢)莽下判斷。

開始,我認同了自己是一個價值投資者,畢竟,唔洗考牌嘅。價投者都有分高低手,我就只係新手。但一啲價投嘅basic principles ,已經入左血。睇事物嘅框架,就好似戴左一副價投嘅眼鏡去睇投資活動,一切都係多得止凡(以及引薦我學投資嘅朋友)嘅無私分享引領我入門。

唔好誤會,我十分欣賞止凡兄,但我唔覺得自己係佢死忠粉絲。有啲佢嘅想法、甚至係理財習慣,我都唔係100%認同,始終每個人背景不同。更重要嘅係獨立思考,對一個價投者黎講係尚方寶劍、或者奧米加加濃炮。

有時不敢思考,點解佢會願意咁無私去分享?相信如果係佢嘅長期讀者,唔會否認呢個人佢,不為名、不為利。堅持逐個留言覆,好多奇怪網友極端發言,佢都仲好有耐性。一係就佢個面皮成尺厚、對人言完全冇感覺,或者佢係傻嘅。但佢都有分享過佢對呢啲人嘅諗法,唔好受,但佢會嘗試放低。佢唔係無恥之徒,更無可能係傻嘅。

咁點解?人性係趨利避害,無理由會做一啲好處都冇嘅嘢。真係有無私嘅人?我理解唔到。或者咁講,近年來我思維模式當中,利己主義(Egoism)比較重,我無法輕易相信無私的存在,除非那是惺惺作態。

最近閱畢Starman兩半作品。只能用四個字形容:醍醐灌頂。閱讀時嘅震撼感概難以忘懷,可以一探高峰美景嘅激動,又一再令我諗起呢一個問題:

點解佢哋會願意花出額外精力,去無償分享一啲極高價值嘅資訊?

(下回續)