不過有時候和朋友分享財務知識也是一種樂趣。最近一個老友（醫生仔）知道我一直有在學習，所以特意問我有沒有甚麼入門書籍可以介紹。故名思義，醫生仔他是剛畢業的醫科生。他提起自己即將工作，每月會有一筆可觀的收入，而同樣作為社會新鮮人，他是從未處理過一筆如此（相對上）龐大的現金，所以他想儘早學懂如何可以有效處理好這筆薪金，而非隨意花費。始終如始龐大的消費能力確是一個很大的誘惑，一不留神自然會傾向提升生活質素而變月光族。
望到他的顧慮，相信大家都感覺得到醫生仔是一個穩重的人。事實上他自少一直都是穩重乖仔型，比我更識諗，好多野都係我問佢意見多。其他人可能都係一句：「你性格咁穩陣，慳住洗儲下錢ok架喇。」錯唔晒，不過作為死黨當然唔會就咁交一句行貨hea佢。何況我亦有朋友提起過，他認識的一個AO現年30中後期，高薪厚職，竟然吐苦水買不到樓，相反同桌朋友們收入未必及得上AO，但都至少有一個物業揸手，可見理財係幾重要？
講返我朋友醫生仔，佢提出左一點，係話想穩健，而唔係炒上炒落賺大錢。其實佢性格同投資取向都好適合價值投資，所以第一時間介紹了取之有道的blog和書，因為自己也是從這裡開始入門價值投資。個人認為價值投資，心態是一切的基礎，止凡的著作是我目前所閱讀過最有效實在而不取巧的吸收方法，而且香港背景，夠貼身。同時又介紹左窮家有道窮一生，因為內容非常貼地，90後好啱睇。再介紹黃澤基先生嘅反轉腦袋投資學，呢本書就比較涉及操作手法，但絕不複雜。學習方法嘅成本低，但相對投資回報高。要價值投資中選中一匹千里馬，可能要花上好多時間，了解公司運作、財務、行業、市場，可算是終身學習；相反盈富操作法非常簡單，重點只在心理質素，同埋「常識」。或者咁講，其實我都只係一個遙望財自門檻嘅新手，而我嘅做法都一樣係盈富，因為最重要係清楚自己嘅能力圈。喺自己能力範圍內投資，係降低風險嘅最佳方法。當我現在未學識去了解一間公司時（生意模式、會計三寶、管理文化等），而去投資落一間公司度，咁做係莽愚嘅。所以喺我有信心去搵出一匹千里馬之前，我都只會係用盈富基金作為我嘅資產增值工具。
但隨後我再諗深一層，發現我以上嘅推薦未必係最合適佢。於是我問左佢一條問題：「你有冇記賬嘅習慣？」「以前有用app，但之後甩左就冇再記。」好正常，因為我都試過。一開始係用app，之後改用google form（參考做法）。但最近改用左excel，先至真正感受到記賬嘅威力。喺推介我嘅記賬方法前，講下記賬係有幾重要。我一直以來作為學生，既無固定零用錢，又無固定收入，洗錢大概就係憑感覺。即使係一個慳家嘅人，但憑感覺洗錢代表住其實我對金錢嘅流動係冇認知嘅。會有「食米唔知價」嘅情況出現，問我一個月嘅花費係幾多，我答唔出，又或者我跟本俾一個自以爲岩但錯嘅答案你。有同齡朋友都有留意投資同財務自由，甚至好像比我更懂得更深入，佢同我講佢覺得財務自由可行性好大，只要慳啲洗。佢話佢一個月洗$3000蚊，並非完全冇可能，只係信不信由你。記賬只係理財第一步，因為你要知道自己啲錢點流出，先可以做到下一步。邊啲位係必須花費(e.g.交通），邊啲位係隨心洗，可能原來自己花左過50%嘅錢喺娛樂或者奢侈品上，如果冇記賬就未必留意到。有左上個月嘅記錄，下個月就可以做預算。第一次預算未必一步到位，可能會預得太多或太少，要多幾個月嘅經驗黎調整，但起碼個大方向冇錯。預算唔係牢不可破嘅天條，而係俾你有個standard，知道洗幾多錢係合理。有左預算，你可以就住黎洗，如果未到15號你就洗左一半Budget，咁你就會小心啲開始節制；佢作用係一個reference，減少你因隨心消費而洗凸嘅可能性。而當你係一個有收入嘅人，你會知道你每個喺扣除生活所需後有幾多錢剩，從而再去諗點運用呢一筆「閒錢」，儲蓄？保險？旅遊？Fuck you money?資產增值？呢個時候先係正式開始考慮點去投資嘅時候。
因此我介紹左佢我自己嘅記帳方法。我係用艾爾文網站上嘅Excel範本，呢個係我用過後最能感受得到金錢流動嘅記賬工具，有種站在巨人的肩膀嘅感覺，因為佢確實建立左一個好全面嘅工具，免去左自己摸索嘅好多麻煩。同普通記賬軟體一樣，有記錄花費嘅部分。呢一點我嘅建議係平時儘量用電子貨幣/信用卡/銀行卡去取締現金，因為可以令你嘅消費有跡可尋。有時生活上未必方便即時記得，或者唔記得mark低，事後又唔記得左洗左幾多錢。所以我養成左每晚翻到屋企記賬嘅習慣，翻查八達通用左幾多錢，如果銀包嘅現金少左先諗翻用左喺邊，通常唔會多過兩三筆。另一個範本全面嘅地方係會劃分負債、信用卡、電子貨幣、多個銀行帳戶、固定繳款等，不在此論述，就等大家去發掘。自此之後，我可以話一蚊都冇放過，準確知道自己銀包有幾錢cash，知道啲錢點流，就算有咩唔清楚，喺一頁excel入面都會一目了然。Last but not least，佢個excel可以配合六個罐子理財法。大概就係將收入分為六份，例如 財務自由帳戶（10%）；教育帳戶（10%）；生活必需帳戶（55%）；玩樂帳戶（10%）；支出用長期儲蓄帳戶（10%）；贈與帳戶（5%）。我覺得係一個好有效嘅理財入門方法，詳情可以去艾爾文網站上睇下。佢嘅Youtube channel都學到好多觀念、心態同方法，只係除左佢對借貸嘅抗拒我不太認同。
雖然醫生本業並非一定會有助於我朋友擅於理財，但不代表不能財務自由，記得止凡兄寫過一個每年收息過千萬的匯豐神級股東，正是一名醫生。投資經典<<投資金律The Four Pillars of Investing>>的作者是一名醫學博士。只要心態正確，專業人士的財自之路很有可能會比其他人順暢呢。共勉之。
我幾年前玩過《現金流》的遊戲，遊戲中的醫生雖然高收入，但伴隨的開支也很多。
回覆刪除現實中，我其中一位姐姐也是醫生，她的收入雖然高，但其他跟本業有關的開支（例如加入什麼協會的費用）也很高。而且，醫生的工作超級忙，很少時間能再用來學習其他知識。偏偏理財又不是一門有規範的課程，不是上幾堂課就能學會，所以您的朋友願意抽空自學，實在難得 😋👍🏻